තරුණ අං

ආවට මුලින් කන් දෙකක් 

වටිනවනේ පස්සේ ආ අං කුට්ටමත්   

කාලේ හැටියට නැතිනම් අං දෙකක් 

වෙන්ට අමාරුයි හරකෙක් 

හිතුවේ එහෙමයි මමත් 

පුල්ලියත් සුදු කිරත් 

මැව්වද හීන කොච්චර කල් ඉඳන්

ලැබෙනකම් වයිරාගේ වගේ අං දෙකක්

බලහන්කො වැස්සියෝ වට කරන් 

වයිරා ඉන්න හැටි රජ කරන්  

දළු දාලා යන්තමට දෙක දෙපැත්තෙන්

මතු වෙද්දී ඇත්තේ වෙනදා නැති සැලකිල්ලක්

වයිරට තරම් සැප නැති වුනත් 

වැස්සියෙක් බැලුවා වරක් දෙවරක්

ළඟදී දවසක ඉඳන් 

ඔලුවේ දැනෙයි හරි ලොකු බරක්

වැඩි වෙනවා විතරමයි 

නැහැනේ කිසි සුවයක් 

ඇන්න මුත් වරු දෙකක් 

තඩිම තඩි කන්දකට පස්

වැඩි වුණා තව තවත් 

තිබුණ ඔලුවේ අමාරුවත් 

වයිරා ළඟටම ඇවිත් 

දුන්නා දැනමුතුකමුත්

ගතේ වෙහෙසට වැඩියෙන් 

හිතේ වෙහසයි ඉතින් 

උඹට ඇති තරුණ අං 

වැඩෙනවිට හෙමි හෙමින් 

උඹේ ඔලුවට දැනෙන 

බරට දැන් හුරු වෙයන් 

ඉවසපන් ඉවසපන් 

වැවෙනතුරු ඉවසපන් 

උඹේ ඔය තරුණ අං

වැවෙන තුරු ඉවසපන්

මදෑ කරගත්තු හරියක් 

ලැබෙනකම් දෙකක් අං  

හිත තවම කලබලෙන්

වැවෙනකම් තරුණ අං

පින්තුරේ ගැන : මේක ක්ලික් වුනේ 2017  මාර්තු, ලොකේෂන් එක Magnolia, TX 

කැමරාව නිකොන් D600, Focal length 300mm, Exposure time 1/320s, ISO400, f/5.6